Португалскиот мрежен оператор REN објави дека во оваа земја минатиот месец 94,9 отсто од електричната енергија е произведена од обновливи извори на енергија, што е големо достигнување во овој сектор.
Кога станува збор за обновливите извори на енергија, најмногу електрична енергија се произведува во хидроцентралите (48 проценти), по што следат ветерните електрани (30 проценти), а остатокот во соларните централи.
Сепак, според податоците на REN, производството во соларните централи е значително зголемено. Имено, минатомесечниот пораст на производството во соларните централи беше најголем месечен пораст досега. Тогаш беше постигнато дека 10 проценти од потребите за електрична енергија се задоволуваат со користење на сончевата енергија.
Во Португалија во првите четири месеци од годинава уделот на фосилните горива во производството на електрична енергија изнесува девет отсто. Во овој контекст, потребно е да се издвои фактот дека употребата на гас во првите четири месеци од годинава е преполовена во однос на првите четири месеци од минатата година.
Сепак, интересно е што уделот од 94,9 отсто на обновливите извори на енергија во производството на електрична енергија не е национален рекорд за Португалија. Всушност, најголемо учество имало во 1978 година, кога изнесувало 95,4 отсто.
Оваа земја направи голем скок напред во користењето на обновливите извори на енергија - од 27 отсто во 2005 година на 54 отсто во 2017 година. Пред три години почна постепено да го укинува производството на јаглен и го зголемува својот хидроенергетски потенцијал. Понатаму, минатата година таа беше трета во светот по користење на ветерот за производство на електрична енергија (29 проценти). По неа следуваа Ирска (36 проценти) и Данска (58 проценти).
Сепак, како што соопшти британската организација Ember, Португалија го имаше својот врв во користењето на ветерот за производство на електрична енергија во 2019 година, пренесува Euronews.