Францускиот претседател Емануел Макрон учествуваше на хуманитарниот фудбалски натпревар Pièces jaunes, кој се одржа за финансирање проекти за поддршка на хоспитализирани деца и адолесценти.
На натпреварот кој се одигра во Плезир, главен судија беше Стефани Фрапар, а учествуваа фудбалски легенди како Дидје Дешам, Дидје Дрогба, Кристјан Карембе и Еден Азар.
Макрон постигна гол од пенал во натпреварот кој заврши 5:2 во корист на неговиот тим, а она што ги освои социјалните мрежи е потегот на поранешниот играч на Ливерпул, Сенегалецот Ел Хаџи Диуф.
Сенегалецот направи неколку дриблинзи и му ја протна топката низ нозете на Макрон, кој немаше друг избор освен да го фаулира Диуф.
Покрај Ливерпул, Диуф играше и за Сошо, Рен, Ланс, Болтон, Сандерленд, Блекбурн, Ренџерс, Донкастер, Лидс и Сабах.
За репрезентацијата на Сенегал одигра 70 натпревари и постигна 24 гола, а се прослави на Мундијалот 2002 кога Сенегал беше големо изненадување уште на отворањето победувајќи го тогаш бранителот Франција. Сенегал на крајот стигна до четвртфиналето. Токму по Мундијалот Ливерпул го купи Диуф.