HMD усвои нов мултибренд пристап за своите мобилни телефони, но сепак се држи до брендот Nokia за фичерфон уреди.
Финскиот производител лансираше три нови модели, од кои секој претставува модерна верзија на класиката. Тоа се моделите 6310 (2024), 5310 (2024) и 230 (2024).
Nokia 6310 носи неколку нови функции за оваа година, сличен е на моделот 6310 од 2021 година, но HMD обезбеди батерија со поголем капацитет од 1.450 mA⋅h и USB-C порта. Останатите спецификации остануваат исти, има VGA камера со блиц, 2,8-инчен LCD екран на предната страна, слот за две SIM со можност за stand-by за двете картички и дополнителен слот за microSD картичка.
Nokia 5310 го задржа дизајнот на моделот од 2020 година, но всушност „порасна“, повисок е и поширок, што направи простор за батерија со капацитет од 1.450 mA⋅h. Уредот користи процесор unisoc 6531F наместо платформата на Mediatek. Има и поголем LCD екран од 2,8 инчи. Овој уред е фокусиран на музиката, а многумина се сеќаваат на моделот XpressMusic од 2007 година. Копчињата за репродукција се наоѓаат на десната страна на телефонот, додека копчињата за јачина на звук се на левата страна. HMD вклучи USB-C приклучок на дното, но „внатре“ сè останува исто, 8/16 MB меморија, слот за microSD, два звучника и FM радио.
Nokia 230 го доби истиот третман како и другите два модела, сличен дизајн и нова батерија. Задржан е истиот 2,8-инчен TFT екран со 65.000 бои, а има истата камера од 2 MP со LED блиц на предната и задната страна. Најголема разлика е батеријата со капацитет од 1.450 mA⋅h и USB-C портата. Bluetooth 5.0 е овозможен благодарение на процесорот Unisoc 6531F, а уредот сѐ уште има 3,5-милиметарски приклучок за слушалки и 8/16 MB меморија.
Цените сѐ уште не се објавени, а треба да се напомене дека уредите се ограничени на 2G мрежата, па нема да работат на 3G и поновите мрежи.
