Легендарниот италијански производител на мотоцикли потврди дека ќе се приклучи на трендот и дека наскоро ќе претстави нов електричен мотоцикл. Од Ducati беше најавено и дека веќе почнале да работат на моделот, кој ќе биде базиран на концептот Ducati Zerо.
Кога Harley-Davidson можеше да го прифати трендот на електрични возила, зошто да не може да го направи и Ducati?
Италијанската компанија ќе го претстави новиот електричен модел, базиран на претходно претставениот концепт Ducati Zero. Според зборовите на генералниот директор на компанијата, Клаудио Доменикали, електричниот мотоцикл ќе биде претставен наскоро, со тоа што се чека вистинскиот момент за неговата промоција.
„Иднината е електрична, а ние не сме далеку од почнување на сериско производство на мотоцикли со таа технологија“, изјави Доменикали.
Ова не е првпат за Ducati да биде споменат во иста реченица со електричната технологија. Уште во 2017 година шефот на нивниот оддел за западна Европа говореше за плановите на овој производител да направи електричен скутер и мотоцикл. Тогаш беше нагласено дека сериското производство ќе започне во 2021 година.
Во Ducati беа разработени повеќе модели изминатите две години, а заедно со Политехничкиот факултет за дизајн во Милано беше претставен футуристичкиот концепт Ducati Zero, кој веројатно ќе биде основа за новиот електричен мотоцикл.
