Извршниот директор на Apple Стив Џобс во Сан Франциско го претстави новиот iPhone. Најважни новитети се поддршката за 3G и GPS, но претставени се и купче интересни апликации.
На WWDC конференцијата наменета за девелоперите, пред 5.000 посетители, говорејќи за новата верзија на софтверот на iPhone (и ред други не толку битни работи), на самиот крај од говорот Стив Џобс од џеб триумфално го извади новиот iPhone.
Што се однесува до изгледот, новиот модел нема некои битни разлики, иако е малку разубавен, но внатре се кријат неколку интересни новитети. Еден од нив е долгоочекуваната поддршка за 3G, а конечно и вграден GPS приемник, со што дефинитивно станува еден од најопремените уреди на светот.
Според Стив Џобс, батеријата сега е уште подобра од претходно: 300 часа на стенд бај, 10 часа разговор, пет до шест часа сурфање, седум часа гледање видео и 24 часа слушање музика.
На крајот, треба да се спомне дека и цената ќе биде значително намалена: 199 долари за моделот со капацитет од 8GB и 299 долари за 16 гигабајтниот модел.
