Понеделник, 04.08.2008
Истражувачите од Кембриџ се блиску до создавањето на вештачки панкреас. Научниците веруваат дека досегашните два оддвоени процеси - константното мерење на глукозата и вбризгувањето на инсулин, наскоро ќе ги сместат во едно "пакување".
Вештачкиот панкреас користи мала цевка за вбризгување на инсулин која е прицврстена за мускул или стомакот. Предноста на новиот уред е што самиот ги чита резултатите од мерењата и ја активира пумпата, наместо како сега - самиот пациент.
Тимот научници го започна тестирањето кај пациенти со дијабетес од тип 1 - автоимуно заболување кај кое организмот по грешка ги уништува клетките на панкреасот кои создаваат инсулин.
"Вештачкиот панкреас значително ќе ја намали потребата за анализа на крвта и вбризгувањето инсулин, на што дијабетичарите се подложени по неколку пати во текот на денот", изјаи доктор Роман Ховорк од Универзитетот во Кембриџ кој ги тестира експерименталните уреди.
