Скапи статисти

Петок, 29.08.2008

Дванаесет статисти бараат 11 милиони долари оштета од Том Круз и неговата продуцентска компанија, поради повредите здобиени за време на снимањето на филмот "Валкир" минатата година во Берлин.

Статистите се здобиле со скршеници на коските и исекотини кога на 19-ти август минатата година паднале од тенк од Втората светска војна додека се возеле низ центарот на Берлин.

Според адвокатот на статистите, тенкот не бил добро обезбеден и несреќата се случила кога тој се откачил за време на вртењето во друга насока. Тужбата и барањето за оштета се поднесени против Круз, кој не бил присутен на снимањето тој ден, како и против неговиот бизнис партнер компанијата Јунајтед Артистс.

Филмот е наречен "Валкир" според шифрираниот назив на заверата која ја планирале група високи германски офицери, со цел да го убијат Адолф Хитлер. Круз во него го играше инспираторот на заверата Клаус фон Штауфенберг.

Премиерата на филмот неколку пати беше поместувана, па најновиот најавен датум е 26-ти декември.