Среда, 03.09.2008
Долго исчекуваниот Nokia N96 беше најавен уште во февруари годинава, кога имаше сјаен и "хај тек" изглед. По седум месеци, конечно ќе се најде во продажба, но веќе не претставува толку посакуван предмет на желба кај корисниците, бидејќи во меѓувреме се случија многу нови моменти.
Од февруари кога беше најавен, до сега, на мобилниот пазар се појавија купче модели кои го засенија N96 со техничките спецификации. Кога на ова ќе се додаде и високата цена на производот, корисниците сметаат дека неговото купување ќе биде лош потег. Но, да ги баталиме прогнозите и да видиме што нуди:
Nokia N96 поддржува дигитална TВ, има камера со резолуција од 5 мегапиксели со Carl Zeiss оптика, GPS навигација со гласовна поддршка, Wi-Fi конективност, 16GB внатрешна меморија која може да се зголеми до 24GB со microSD картичка, N-Gage игри и голем 2.8 инчен TFT дисплеј.
Дизајнот на N96 го следи дизајнот на N81 (што искрено многу не ни се допаѓа). Единствената можност која го дели N96 од конкуренцијата е вградениот DVB-H TV тјунер, но сепак - корисниците ширум светот не покажуваат некое големо внимание за него.
Сепак, времето ќе покаже. Првите парчиња од N96 веќе се испорачани, а ќе бидат достапни по предвидена цена од 550 евра (пред даноци и останати давачки). Солено...
