Четврток, 04.09.2008
При специјализирана акција на полицијата во Ѓирокастро биле блокирани шест цистерни со вода кои се користеле за напојување на површините засеани со канабис, јавија албанските медиуми.
На патот Ѓирокастро - Какавија биле задржани три камиони кои биле претворени во цистерни кои патувале за селото Лазарат, познато по големиот број насади со канабис. Првично операцијата започнала како полициска акција за запирање на превозните средства без регистарски таблици.
Во акцијата се уапсени неколку лица.
Селото Лазарат стана познато по огромните количества канабис, кои локалното население ги одгледува.
Минатиот месец весникот „Газета шкиптаре“ имаше неколку написи, според кои селаните во Лазарат планирале да спечалат околу 60 милиони евра од овогодинешната реколта од канабис. Весникот алармираше за ситуацијата во селото и за неможноста на полицијата да се справи со ситуацијата.
