На локацијата кај поранешната библиотека во Охрид денеска започнува првиот историски фестивал „Средновековен Охрид“.Историскиот фестивал е интерактивна и мултимедијална културолошко - историска и едукативна манифестација втемелена на традиционалните вредности на Македонија, простор во кој се преплетуваат цивилизациите, народите, културите и религиите.
Фестивалот ќе биде отворен со пригодна програма, во рамките на која ќе биде поставен и средновековниот базар. На оваа церемонија ќе биде објавен и добитникот на главната награда на Фестивалот - Чувар на традицијата.
Посетителите ќе имаат можност да го видат процесот на изработка на ракотворените предмети и самите да се обидат да ги изработуваат. Уметничката програма се состои од настапи на музички групи, хорови, солисти, танчери, жонглери, акробати на повеќе локации низ стариот град во попладневните и во вечерните часови.
Учество на фестивалот ќе земат ансамблот Баклава, Гиш со музичко - поетски перформанс, хорот за средновековна музика Хераклеа, групата за средновековни и ренесансни танци Рагусеум од Дубровник, како и жонглерите и акробатите Фаз Бабл. Фестивалот ќе трае до 8 септември.
