Македонија треба во следните клучни месеци да работи напорно за да ги исполни условите кои и се поставени од Унијата, истакна Јелко Кацин европарламентарец од Словенија и лобист за Македонија.
Порача Владата и опозицијата заеднички да работат бидејќи Брисел ќе го оценува степенот на демократија и соработка помеѓу нив во ноемврискиот извештај.
- Во европскиот Парламент имате многу искрени пријатели. Ние се трудиме да се создадат услови да се направи позитивен извештај, но вие треба сами да поработите на исполнување на условите - изјави Јелко Кацин.
Иако како услови кои треба да ги исполниме беа наброени осум, сепак спорот со името со Грција се наметна како пречка за влезеот на Македонија во НАТО и ЕУ. Според Кацин, проблемот со името не треба да се интернационализира туку да се реши на дипломатски начин помеѓу двете засегнати страни.
- Треба да се вложат напори и да се постигне договор и врз основа на тој договор да се деблокира овој спор кој го отежнува патот на Македонија кон ЕУ - вели Кацин.
Кацин порача Собранието како највисок законодавен дом во државава да ги носи законите преку нормална парламентарна процедура. Според него многу е поважен квалитетот на законите кои се носат да биде во согласност со Унијата, а не само квантитетот на донесените закони.
