Отпуштања во EA

Издавачот на видео игри Electronic Arts објави дека поради значителни квартални загуби во компанијата, ќе мора да отпушти околу 6% од својата работна сила (што значи од 500 до 600 работници), со што би ги намалиле трошоците.

Како причина за лошите финансиски резултати во периодот од јуни до септември се наведуваат зголемените трошоци за развој и маркетинг. Загубата на Electronic Arts изнесува околу 310 милиони долари, односно 97 центи по акција, што е далеку поголема од загубата во изминатата година во истиот период, која изнесуваше 195 милиони долари.

И покрај огромните загуби, продажбата на EA е покачена за дури 40% и изнесува 894 милиони долари. Тоа што сепак може да ги радува сите во оваа компанија (добро, освен тие што ќе останат без работа) е доаѓањето на божиќниот период за шопинг, во кој се очекува најголемата квартална заработка.