Одборот на директори на Меѓународниот монетарен фонд (ММФ) синоќа на Исланд му одобри кредит во висина од 2,1 милијарди долари, наменат за санација на банкарскиот систем и за стабилизација на вкупната економија во земјата.
Со ова Исланд стана првата западноевропска земја што зема кредит од ММФ по 1976 година, која тоа го стори Велика Британија.
Според договорениот аранжман, на Исланд веднаш ќе му бидат исплатени 833 милиони долари од кредитот, додека останатите средства ќе ги добива во осум транши од по 155 милиони долари. Кредитот е со грејс период од две години.
ММФ и Исланд уште на 24 октомври постигнаа договор за кредитот и тој требаше да биде одобрен на 5 ноември. Меѓутоа, донесувањето на формалната одлука за негово доделување беше одложено на барање на Велика Британија и Холандија, кои инсистираат на исплата на компензации на нивните штедачи во исландските банки, чии сметки беа замрзанти по крахот на банкарскиот систем во Исланд.
