Четиринаесетте луѓе евакуирани од крузерот Diamond Princess кои беа вратени во САД со чартер лет, имале позитивни резултати за присуство на новиот корона вирус, стои во заедничкото соопштение од Министерството за здравство на САД и Одделот за човечки ресурси.
Патниците се дел од над 300 луѓе кои беа евакуирани од бродот што се закотви во пристаниште во Јокохама, Јапонија и кои синоќа беа донесени со авиони до воени бази во САД.
Американски официјални лица соопштија дека патниците се позитивни на вирусот Covid-19, како што покажале резултатите од тестирањата направени три дена пред евакуацијата.
На летовите, заразените патници биле изолирани од другите и ситуацијата била внимателно следена.
Останатите патници ќе останат во карантин 14 дена. Некои од патниците не сакале да бидат евакуирани во истите авиони со заразените, стравувајќи дека ќе се заразат при транспорт.
Кај уште 99 лица кои се наоѓаат на крузерот е потврдено присуство на новиот корона вирус, соопшти денеска јапонското Министерство за здравство.
Бројот на заразени на бродот, во кој има 3.711 патници и членови на екипажот, се зголеми на 454, откако вчера беше потврдено дека 355 луѓе се заразени.