The Room Next Door, новиот филм на легендарниот Педро Алмодовар, привлече внимание на филмскиот фестивал во Венеција.
На црвениот тепих, режисерот прошета со актерките Тилда Свинтон и Џулијан Мур.
Овој филм е адаптација на романот What Are You Going Through од Сигрид Нуњез. Приказната е за писателката Ингрид (Џулијан Мур) која го обновува пријателството со Марта (Тилда Свинтон).
Марта, која се бори со терминален карцином на грлото на матката, сака да умре достоинствено и ја замолува Ингрид да биде во соседната соба кога ќе го земе апчето за евтаназија. Филмот беше премиерно прикажан во Сала Гранде, а публиката ја награди екипата со громогласен аплауз кој траеше дури 17 минути.
„Тоа е нешто на кое му се восхитуваме на ликот на Тилда. Таа решава да се ослободи од ракот со донесување на оваа одлука. ‘Ако умрам порано, ракот нема да ме победи’, вели таа. Таа наоѓа начин да ја постигне својата цел со помош на нејзината пријателка, но тие треба да се однесуваат како криминалци. Низ целиот свет треба да има можност за евтаназија“, рече Алмодовар.
Мур рече дека не познава режисер кој би можел да сними подобар филм за женското пријателство од Алмодовар.
„Многу ретко имаме приказна за женско пријателство, а особено за пријателки на постара возраст“, додаде таа.
Свинтон изјави дека одамна му рекла на Алмодовар дека ќе направи сè за да добие можност да работи со него, што и го направила.
„Му реков дека поради него ќе научам шпански. Сведочењето на неговата духовитост, строгост и апсолутна дисциплина предизвикува стравопочит, и сè уште се чувствувам како студентка што гледа негов филм за прв пат“, рече таа.
Филмот ќе почне да се прикажува во кината од 18 октомври.
