Шест доброволци од Русија, САД и ОАЕ ќе поминат осум месеци симулирајќи мисија на Месечината како дел од меѓународниот проект SIRIUS-21 кој денеска стартуваше во Москва.
Сценариото вели дека шестмината прво ќе одат на лансирање кон Месечината, ќе се спуштат на нејзината површина и потоа ќе се вратат на Земјата - сето ова за 240 дена.
Всушност, тие цело време ќе бидат затворени во автономно здание во руската престолнина. Со Оперативниот центар ќе комуницираат преку радио врска, а со своите најблиску ќе можат да стапат во контакт само преку електронска пошта.
Тројца учесници се од Русија, двајца од САД и еден претставник имаат Обединетите Арапски Емирати:
- Олег Блинов (Русија) - командант на екипажот
- Ешли Ковалски (САД) - инженер за летање
- Викторија Кириченко (Русија) - лекар
- Вилијам Браун (САД) - истражувач
- Салех Омар ал Амери (ОАЕ) - истражувач
- Јекатерина Карјакина (Русија) - истражувач.
Проектот е взаемна соработка на Институтот за биомедицински проблеми при Руската академија на науки и Програмот за човечки истражувања на НАСА.
Името SIRIUS-21 е акроним од Scientific International Research in Unique Terrestrial Station Experiment (Научно меѓународно истражување во уникатен експеримент на копнена станица), а бројот 21 е годината кога почна проектот - 2021.
Волонтерите ќе извршуваат задачи какви што имаат космонаутите и астронаутите на вистинска станица, во што се вклучени и дневен медицински моноторинг и редовен физички тренинг. Специјални вселенски одела со VR шлемови беа направени за овој проект за да се симулираат активности на екипажот на површината на земјиниот сателит. Меѓу другите работи, ќе треба и да соберат примероци од почвата и да управуваат со ровер.
По професија командантот Блинов е инструктор за космонаути, Кириченко е хирург, а Карјакина е стјуардеса. Од двајцата Американци, Ковалски работи во Американскиот вселенски команден систем, додека Браун има диплома по руски јазик и литература. Ал Амери е тест космонаут при Вселенскиот центар Мохамед бин Рашид во ОАЕ.