Поминаа 26 години од смртта на Милан Младеновиќ, фронтменот на групата ЕКВ и еден од најзначајните музички уметници од поранешна Југославија.
Легендарниот рокер кој го нарекуваа „дечак из воде“ е роден на 21 септември 1958 година во Загреб, а уште од многу рана возраст покажувал силен интерес и љубов за музика. На 6-годишна возраст со семејството се преселил во Сараево, а во 1970 во Белград.
При крајот на 70-тите години со неговиот другар Драгомир Михајловиќ Гаги го основале бендот „Шарло Акробата“. Сепак, најголемата слава ја стекна со групата „Екатерина Велика“. Во 1985 година го издаваат истоимениот албум кој доби низа позитивни критики. Во 1986 година излегува албумот со песната „Ти си сав мој бол“ и со неа ЕКВ стекнуваат огромна популарност.
Велат дека во Младеновиќ биле вљубени сите девојки во тоа време, но неговиот љубовен живот сепак останува енигма. Последните години од неговиот живот ги поминал со Маја Маричиќ, песната „Очи боје меда“ ја напишал за неа.
По спектакуларниот настап во Будва во 1994 година, Младеновиќ е хоспитализиран во болница каде што му соопштуваат дека има рак на панкреасот. По три месеци борба со ракот, умира на 5 ноември во Белград. Починал на само 36-годишна возраст, а по неговата смрт престана да постои и „Екатерина Велика“. Кога починал имал само 35 килограми.
Неговата музика и дело се сè уште живи и после толку години по неговата прерана смрт. Тој остави длабока трага и незаменливо место во музичката историја.