Пандемијата промени многу работи во секојдневието на нашите животи и донесе нови правила. Како се одрази на нашиот приватен живот и на работата?
За професиите и фирмите за кои е изводливо, повеќето вработени ги заменија своите канцеларии со својот дом, а деловните процеси се префрлија онлајн. Состаноците почнаа да се одржуваат преку Zoom, Skype и други алатки за онлајн комуникација. Иако поголемиот број од вработените се вратија на своите работни места, голем број фирми одлучија и понатаму да продолжат со работа од дома.
Иако трговските центри и продавниците ги отворија своите врати, процесот на купување има нови правила и задолжително е носење на маски, дезинфицирање на рацете при влез и одржување растојание. Бизнисите од секторот трговија сфатија дека треба да функционираат и како онлајн продавници, а многу луѓе кои претходно не го правеле тоа, почнаа да купуваат онлајн.
Можеби најголемиот предизвик за време на пандемијата беше одржувањето на физичкото дистанцирање да не се претвори и во друштвено дистанцирање, туку да се одржат контактите со роднините и пријателите. Во ова, помогнаа технологијата и друштвените мрежи.
Поради физичкото дистанцирање и избегнување на дружење со поголеми групи луѓе, викендите и слободното време почнавме да го поминуваме повеќе во природа, рекреирајќи се и истражувајќи нови места. Седењето на кафе и во кафани го заменивме со долги прошетки, возење на велосипед и останати физички активности. Многу од нас го заменија јавниот превоз со велосипед.
Пандемијата не потсети и колку е важна грижата за сопственото здравје и колку е важна едноставната хигиена на рацете. Нè освести и дека на постарите им треба наша помош и дека со нашето одговорно однесување можеме да го сочуваме и нивното здравје.
