Откако се повлече од јавноста на нешто подолго од две години, Адел се враќа на сцената најавувајќи го албумот „30” и говори за трансформацијата низ која помина во последниот период. За разводот, слабеењето и учењето како повторно да се сака себе си.
Адел ја шокираше јавноста кога пред неколку месеци покажа огромна физичка трансформација. Истовремено предизвика и лавина реакции и претпоставки како успеала да направи толку голема промена и што планира во иднина. Кратко после тоа, откри дека е во врска со кошаркарскиот агент Ричард Пол, со кој почнала да се гледа неколку месеци по разводот.
Во интервјуто за британското издание на Vogue, Адел открива дека вежба во теретана веќе три години и дека прогресот не секогаш бил линеарен: „Во теретана почнав да одам бидејќи на тоа место почнав да се ослободувам од анксиозноста на здрав начин. Тоа е време за мене, место каде можам да го исфрлам целиот стрес. Мојата цел никогаш не беше да изгубам килограми, сакав да се доведам во ред физички, за во тој процес да научам како поздраво да работам на својата психа и емоциите”.
Свесна е дека нејзината драстична физичка трансформација привлекла големо внимание во јавноста, но тоа не ја изненадило: „Моето тело отсекогаш беше една од главните теми во медиумите. Но, би сакала луѓето да сфатат дека и покрај физичката трансформација останав истата јас. Ме повредија коментари од други жени за моето тело, бев многу разочарана од тоа што го слушнав и прочитав”.
Вели дека повеќето приказни за нејзиниот љубовен живот се апсолутни измислици, а дека со Ричард се чувствува сигурно и дека нема ни траг од анксиозноста која ја имала порано.