Шпанскиот тенисер Рафаел Надал ја заврши сезоната поради повреда на стапалото.
„Бикот од Мајорка“ се мачеше со болките во стапалото, па неодамна изјави дека е подобро да одмори цела година.
Овој проблем го мачи уште од 2005 година, но сè уште не можат да откријат од каде точно доаѓа болката.
За тоа зборуваше неговиот тренер Карлос Моја.
„Имаше денови кога тренингот го завршуваше со болки, а наредниот ден веќе се чувстваваше добро. Не знаеме од каде доаѓа повредата. Има дијагноза, но не е јасно кој е најдобриот третман“, рече Моја.
Приоритетот е Рафа да се опорави.
„Главната цел на Рафа е да се опорави и да се чувствува добро. Ништо не му помогна оваа година. Почна да игра со болки во грбот во Австралија, одигра само седум турнири, ги пропушти Вимблдон, ОИ, а сега ќе ги пропушти и УС Опен. Затоа не смееме да гледаме назад туку да се концентрираме на оздравувањето“, објасни Моја и заклучи:
„Најдобрата одлука беше да ја прекине сезоната, да ги одмори стапалата и да се подготви за следната година“.
Надал до крајот на годината може да не се најде на листата Топ 10.
