Европскиот производител на авиони Airbus планира да укине 15.000 работни места поради тешката финансиска состојба предизвикана од пандемијата на коронавирусот.
Повеќето работни места треба да се кратат во Франција и Германија, по 5.000 во секоја од нив, 1.700 во Обединетото Кралство, околу 900 во Шпанија, а остатокот во други земји.
Менаџментот на Airbus веќе почна разговори со синдикатите и очекува до есенва да постигне договор, а планот за намалување на 15.000 работни места треба да се спроведе до следното лето.
– Сакавме да избегнеме ваква ситуација, но Airbus се соочува со најголемата криза кога станува збор за авиоиндустријата, изјави вчера извршниот директор на Airbus, Гијом Фури.
Француското Министерство за економија се спротивстави на планот за намалување на 15.000 работни места, сметајќи дека е претерано.
Компанијата го заврши првиот квартал со загуба од 481 милион евра, а производството во Airbus најверојатно ќе се намали за 40 проценти во текот на следните две години поради пандемијата на коронавирусот. Исто така, Airbus очекува воздушниот сообраќај да се врати на старите параметри дури во 2023 година. Во Airbus се вработени 135.000 луѓе, а 90.000 од нив работат на производство на делови од авиони.