Холадскиот шампион одлучи на необичен начин освојувањето на титулата да го прослави со своите навивачи.
Трофејот наменет за шампионот на Холандија за актуелнава сезона во Ајакс одлучија да го стопат и од него да направат 42 илјади мали шампионски ѕвездички.
Секој навивач кој има сезонска карта од денеска ќе добие по една ѕвездичка или „дел од Ајакс“, како што наведува клубот.
„Сезонава игравме без нашите навивачи, односно без тие да бидат на трибините. И покрај тоа ја чувствувавме нивната поддршка секоја недела, од влегувањето на стадион, преку социјалните мрежи и личните контакти. Кога претходно рековме дека 'оваа титула е и ваша' мислевме на навивачите, а делбата на трофејот е конкретен доказ дека сме сериозни во таа намера. По турбулентната година, сакаме сите наши навивачи да бидат среќни“, изјави директорот на Ајакс, легендарниот голман Едвин ван дер Сар.
И капитенот на тимот, српскиот репрезенттаивец Душан Тадиќ, се огласи по повод ваквиот потег за освојувањето на 35-тата шампионска титула.
„Играњето пред празен стадион не може да се спореди со атмосферата на 'Амстердам АренА'. Навистина ни недостасуваа навивачите изминатава сезина на сите натпревари и затоа сакаме да им се оддолжиме преку овој гест“, рече Тадиќ.
