Фудбал
ЗИМСКИ ТРАНСФЕР ПЕРИОД 2020

Академија Пандев ѝ парира на Шкендија: Донесе играч од Северен Кипар

9. јануари 2020 - 17:05 | Ф.З.

Откако тетовчани се пофалија со ангажман на фудбалер од втората лига на Велс, струмичани веќе наредниот ден им вратија со бомба: потпишаа со играч од непризнаената лига на Северен Кипар.

Ндуе Мујеци е најновото засилување за струмичкиот тим кој треба да го појача нападот и да донесе многу голови.

Овој 26-годишен напаѓач е Албанец роден во Скадар кој кариерата ја почнал во младинскиот тим на локалниот клуб Влазнија. Потоа играл во второлигашот Ада пред да замина надвор од родната земја. Почнал од латвискиот Вентспилс, потоа играл за бугарските Пирин и Дунав, па во грузиски Сабуртало од каде во 2018 се сели на Кипар, ама на турскиот дел од островот. Игра за Генчлик Гуџу, прави авантура до Хонгконг во тимот на Хепи Вали, па се враќа во Северен Кипар во редовите на Џихангир од каде доаѓа во Струмица.

Најмногу му одело во латвиската лига, инаку послаба од македонската, каде во две години одиграл 64 натпревари, постигнал 23 голови и запишал 9 асистенции. Но, тоа било пред 3 и пол години. Во од УЕФА непризнаената лига на Северен Кипар изминатава полусезона постигнал 9 голови.

Академија Пандев во есенскиот дел имаше проблеми со реализацијата бидејќи на 18-те натпревари постигна само 19 голови. Дали засилувањето од Северен Кипар ќе го разбуди струмичкиот напад?

Коментирај