Неодамна беше утврдено дека вкупно осум Android апликации од продавницата Google Play го содржат малициозниот софтвер Joker.
Апликациите што ги „улови“ Quick Heal Security Labs, можат да собираат и крадат податоци од корисниците на смартфони со Android и да создаваат разни други проблеми.
За среќа, истражувачката фирма ѝ го укажа ова на компанијата Google и осумте апликации наводно биле отстранети од Play Store. Тие повеќе не се достапни за преземање, но самите апликации сè уште претставуваат закана затоа што остануваат на интернет, но и потенцијално на вашите телефони.
Малициозниот софтвер Joker може да украде кориснички податоци и дури може тајно да ги пријави корисниците на скапи платени претплати за кои никогаш не се пријавиле. Злонамерниот софтвер може да ви ги украде листите со контакти, информации за уредот, пораките и многу повеќе.
Се препорачува корисниците на Android смартфони кои веќе ги презеле овие апликации, да ги отстранат што е можно поскоро и да извршат скенирање на вирус со употреба на реномирана алатка за антималвер. Штетните апликации се:
Auxiliary Message
Fast Magic SMS
Free CamScanner
Super Message
Element Scanner
Go Messages
Travel Wallpapers
Super SMS
Сопствениците на Android смартфони треба да знаат дека не треба да симнуваат непознати апликации кои немаат никаква репутација, особено ако користат апликации за пораки, скенери или позадини, бидејќи овие категории се многу популарни меѓу хакерите и често се користат како параван за малициозен софтвер.
