УЕФА денеска ја направи и жрепката за последното квалификациско коло за пласман во фазата по групи од Лига Европа, а единствен македонски преостанат учесник е тетовска Шкендија.
Шкендија допрва треба да се избори за пласман во плеј-офот, а за тоа ќе треба да направи вистинско чудо и да го елиминира Тотенхем на Жозе Мурињо, Хари Кејн, Сон Мин-хјон, Иго Љорис... За пресметка со премиерлигашот тетовци се изборија откако синоќа го исфрлија романски Ботошани со победа на гости.
Доколку навистина се случи чудо нареден четврток во Скопје, тогаш Шкендија во плеј-офот би имала условно кажано полесна задача.
Денешната жрепка на УЕФА одлучи победникот од дуелот Шкендија - Тотенхем да биде домаќин на победникот од дуелот на руски Ростов и израелски Макаби Хаифа. За Русите настапува нашиот Давид Тошевски. Победникот од тој дуел, кој е закажан за 1 октомври, ќе избори пласман во фазата по групи од новата сезона на Лига Европа.