Освен што нема никакви ограничувања за влез во земјата, Албанија, за сите туристи кои одлучиле да одмораат на нејзиното крајбрежје и другите туристички места, обезбеди бесплатни брзи тестови во случај на појава на симптоми на COVID-19.
Министерката за здравство и социјална заштита Огерта Манастирлиу информираше дека почнале да функционираат 29 здравствени амбуланти каде 24 часа се достапни здравствени услуги, како и бесплатни тестови за секој сомнителен случај.
-Во секоја летна здравствена амбуланта во крајбрежните и планинските туристички области, се нуди 24-часовна услуга за секоја итна медицинска помош, како и бесплатен брз тест, за секој случај за кој постои сомневање за COVID-19. Во случај на појава на некој од симптомите, одете во најблиската здравствена амбуланта. Заедно, да го ограничиме ширењето на коронавирусот, за безбедна туристичка сезона, напиша Манастирлиу во објава на Facebook.
На располагање е и бесплатниот телефонски број 127.
Во меѓувреме во земјата продолжува процесот на имунизација, а епидемиолошката состојба е стабилна.
Четири дена по ред нема починат како последица од COVID-19, бројот на заразени е минимален, односно вчера имаше само четири нови случаи, од направени 2.771 тест.
Aктивни случаи има 124, од кои болнички се лекуваат само седум пациенти.