Оставањето на Кристијано Роналдо на клупата за резерви на вчерашното гостување кај Удинезе само ги подгреа шпекулациите за негово заминување. Затоа, тренерот Масимилијано Алегри мораше да даде добро објаснување.
Иако сите очекуваа Роналдо да се најде во почетните единаесет кај Јувентус, кој во 1. коло од новата сезона во Серија А имаше гостување во Удине кај тимот на Удинезе, на изненадување на многумина тоа не се случи.
Во нападот на „Старата дама“ шанса добија Пауло Дибала и Алваро Мората, а Роналдо во игра влезе точно по еден час игра, менувајќи го токму Мората.
„Роналдо се чувствува добро. Зборував со него пред натпреварот, му кажав дека планирам да почне од клупата. Се согласи. Одигра солидно кога влезе во игра, постигна и гол, но му беше поништен“, вели Алегри за DAZN откривајчи дека тоа било само негова тактичка одлука.
Роналдо влезе во игра откако Удинезе намали на 1:2. Домаќините потоа и израмнија, а Роналдо во судиското надополнување со глава постигна гол за победа кој потоа по интервенција на ВАР беше поништен бидејќи се покажа дека Роналдо бил во офсајд.
„Во весник ги прочитав шпекулациите. Тој никогаш не ни има кажано дека сака да си замине. Напротив, Роналдо ми рече дека останува во Јувентус“, вели Алегри околу наводното заминување на Португалецот од Торино.
„Одигравме добар натпревар. За жал, таков е фудбалот. Требаше да бидеме подобри во второто полувреме кога не бевме способни да се справиме со одредени ситуации. Ова мора да ни биде лекција“, додаде тој околу крајниот резултат на дуелот во Удине каде Јуве не ги освои планираните три бода.
