Старо-новиот тренер на Јувентус, Масимилијано Алегри на вчерашната прес-конференција ги назначи капитените на „Старата дама“.
Џорџо Кјелини ќе биде првиот капитен, а негов заменик ќе биде Пауло Дибала.
Еден од новинарите се интересираше зошто Алегри не го назначи Леонардо Бонучи за капитен.
„Ако сака капитенска лента, тогаш нека си ја купи, па нека си ја носи. Тој знае дека во последната година од мојот последен мандат во Јуве, капитени беа Манџукиќ и Кедира. Капитените исто така се избираат според бројот на натпревари во клубот. Прв е Кјелини, потоа Дибала. Бројот на натпревари на Леонардо е поништен откако се пресели во Милан и почна од нула“, додаде Алегри, кој очигледно не му прости на Бонучи за бегството од Јуве во Милан во 2018 година. Искусниот капитен покајнички се врати во Торино по само една година, но неговите фанови не му простија на предавството, а очигледно ни Алегри.
Инаку, во дресот на Јувентус, Бонучи одигра 442 натпревари и освои дури 17 трофеи.
Алегри го коментираше и статусот на Кристијано Роналдо.
„Роналдо е одличен играч и паметен дечко. Зборував со него вчера, како и со другите играчи. Му реков дека ова е важна сезона и бев среќен што повторно се сретнав со него. Тој сега има уште поголема одговорност затоа што пред три години имавме поискусен тим, додека сега имаме многу млади играчи“, заврши Италијанецот.