Алек Болдвин тврди дека не го повлекол чкрапалото на пиштолот со којшто беше убиена снимателката Халина Хачинс.
Ова се наведува во делови од неговото прво интервју по несреќното убиство, снимено на 21 октомври во Ново Мексико, САД.
– Видете, чкрапалото не беше повлечено. Не го повлеков, изјави актерот во интервју со Џорџ Стефанопулос од ABC.
– Значи, никогаш не сте го повлекле чкрапалото?, праша Стефанопулос. – Од каде „жив куршумот“ во пиштолот?
– Не, не и не. Никогаш не би вперил пиштол кон некого и не би го повлекол чкрапалото. Никогаш!, одговори Болдвин.
Тој додаде дека не му е јасно како се појавил куршумот на снимањето на филмот Rust на ранч во близина на Санта Фе. Снимателката Халина Хачинс беше убиена на снимањето на тој филм, а режисерот Џоел Суза беше ранет, откако, според очевидци, Болдвин пукал од пиштолот.
Засега против него не е покренато обвинение.
Двајца членови на тимот покренаа граѓанска тужба поврзана со несреќата, а продуцентот и некои други лица се товарат за невнимание.
Според филмското сценарио, од него не било барано да пука во таа сцена. Сценаристката Мами Мичел, која повикала полиција по трагичниот настан, во тужбата тврди дека Болдвин, пукајќи од пиштол во насока на Хачинс, постапил непромислено и ги прекршил или занемарил безбедносните протоколи за муниција и оружје на сетот. Таа смета дека самиот Болдвин требало да провери дали има муниција во пиштолот и оти не требало да ја зема здраво за готово изјавата на помошникот-режисер дека оружјето е безбедно.
Ако не пукал Болдвин, тогаш се поставува прашањето кој пукал?
