Чилеанското крило по многу перипетии на крајот спогодбено го раскина договорот со Манчестер Јунајтед и како слободен играч потпиша со тимот од Милано.
Манчестер Јунајтед сепак не заработи ниту евро од Алексис Санчес. Минатото лето преговорите со Интер резултираа со позајмица и тоа поголемиот дел од платата да му го отплаќа Јунајтед откако Англичаните не ги прифатија понудите за трансфер кои ги доставуваше Интер. На крајот, излезе дека Манчестер беспари го продаде својот играч кој според договорот со „Црвените ѓаволи“ заработуваше високи 12 милиони евра по сезона.
Чилеанецот имаше договор со Манчестер до 30 јуни 2022 година, но се договори истиот да биде спогодбено раскинат. Така, денеска како слободен играч потпиша 3-годишен договор со „Нераѕурите“ според кој ќе заработува нешто помалку од 7 милиони евра по сезона.
Според тоа, Санчес сега е третиот најплатен играч во Интер, веднаш зад Ромелу Лукаку и Кристијан Ериксен.
Играта на Санчес до пред паузата поради коронавирусот навестуваше дека Интер нема да го задржи бидејќи и самиот Антонио Конте беше незадоволен од она што го прикажуваше, иако дел од сезоната пропушти поради повреда која сигурно влијаеше и на неговата форма. Затоа, пак, по паузата Санчес покажа друга форма и стана еден од најактивните играчи на теренот, а со тоа и се избори за место во првите единаесет.