Компанијата Amazon секоја година уништува голема количина непродадена роба којашто вклучува и паметни ТВ уреди, лаптоп компјутери и слично, откри нова истрага.
Објавена е снимка што прикажува голема количина отпад од еден од дваесет и четирите центри во Велика Британија. Производите се главно неискористени и сместени во кутии со ознаката „destroy“ (уништи). Станува збор за дронови, книги, слушалки, фенови и слично.
Снимката е отстапена од еден од вработените кој сака да остане анонимен, а кој тврди дека работниците неделно уништуваат околу 130.000 парчиња различна роба.
„Нема причина за уништување на уредите. Правосмукалки, лаптоп компјутери, таблети, маски. Околу 50% од робата не е отворена, додека другата половина е вратена роба во добра состојба. Вработените станаа рамнодушни кон тоа што се бара од нив“, вели анонимниот извор.
Со истрага е откриено дека стотина илјади непродадени или вратени предмети секоја недела завршуваат во зоната за уништување. Како причина за уништување е моделот на работа на Amazon. Многу продавачи низ светот ги чуваат производите во магацините на Amazon, па колку што подолго стојат толку се поголеми трошоците. На крајот е поевтино да бидат уништени.
Ова што го прави Amazon не е илегално, но владата добива повици за интервенција. Од Greenpeace наведуваат дека се работи за непотребен отпад, а начинот на отстранување е шокантен.
Од Amazon сега велат дека во иднина нема да има уништување, туку приоритет ќе бидат донирањето, препродажбата, рециклирањето.
