Компанијата Amazon одлучи да им подели повеќе од 500 милиони долари на работниците кои работеа во првите линии во текот на пандемијата со коронавирусот. Бонусот ќе им биде даден во знак на благодарност, истакнаа од компанијата, пренесе CNN.
Висината на бонусот ќе варира. Работниците со полно работно време, работниците на Whole Foods, возачите и партнерите за достава ќе добијат по 500 долари, додека оние со половина работно време до 250 долари. Лидерите на првите линии ќе добијат по 1.000 долари, а сопствениците на партнерските услуги за достава кои помагаат во испораката на пратките ќе добијат по 3.000 долари. Возачите кои работеа повеќе од 10 часа во јуни ќе добијат 150 долари.
Amazon имаше полни раце работа бидејќи во текот на пандемијата луѓето остануваа затворени дома и пазареа онлајн. Компанијата беше критикувана поради условите за работа, како и за тоа дека не даваше доволно информации за влијанието на здравствената криза врз работниците. Досега од коронавирусот починаа најмалку 10 вработени во магацините.
Од Amazon соопштија дека се преземени сите чекори за превенција на ширење на вирусот, за таа цел се потрошени над 600 милиони долари во првите три месеци. Се очекува во вториот квартал трошоците да пораснат на најмалку 4 милијарди долари.
