Американскиот генерал Марк Мајли изјави дека САД внимателно ја следат ситуацијата во Пацификот, особено во контекст на можен кинески напад на Тајван.
Во интервју за BBC, Мајли рече дека Кина јасно развива способности кои би служеле за организирање напад на Тајван во одредено време.
„Во однос на ударните способности, мислам дека Кина ги развива. Претседателот Си Ѓинпинг на конференции зборуваше за тоа дека Кинеската Народноослободителна Армија развива способности за напад во некој момент. Дали ќе го направат тоа или не е политички избор кој ќе се заснова на тоа како Кинезите ги гледаат придобивките од таквиот чин во тоа време“, рече Мајли.
Сепак, и покрај бројните активности и провокации, американскиот генерал е на мислење дека нападот нема да биде извршен во блиска иднина.
„Во овој момент нема индикации или предупредувања за нешто неизбежно, но повторно, ние ја следиме ситуацијата многу, многу внимателно“, рече американскиот генерал.
Кога станува збор за размислувањата во Кина за можен напад на Тајван, многу аналитичари сметаат дека можностите за напад во овој момент се мали.
„Пекинг признава дека таквиот потег би бил премногу скап и катастрофален, не само за Кина, туку и за целиот свет. Конзистентниот став на Кина би бил да бара мирно обединување со Тајван и ќе дејствува само ако се соочи со провокација“, пишува BBC.
Единствениот поттик за војна веројатно би бил потег со кој Тајван официјално ќе прогласи независност од Кина.
„Ова е нешто што претседателот на Тајван Цаи Инг-вен го избегнува, но инсистира да зборува за Тајван како суверена држава“, се истакнува во анализата.
Ситуацијата речиси ескалира на крајот на минатата година кога Кина испрати рекорден број борбени авиони во она што Тајван го смета за своја одбранбена операција.