Научници „произведоа“ во лабораторија вештачки мозок кој се развива како човечки, што може да даде подобар увид во болести како што се Алцхајмерова болест или шизофренија.
Американски научници во Лос Анџелес спроведоа широка генетска анализа на таканаречените органоиди на кои им беше овозможено да се развиваат и растат во лабораторија до 20 месеци.
Она што научниците го открија е дека вештачкиот мозок расте во фази што се совпаѓаат со развојот на мозокот кај бебињата.
Истражувањата укажуваат дека органоидите на вештачкиот мозок може да се развијат подалеку од феталната фаза, што е спротивно на она што претходно се веруваше.
Според ова откритие, органоидите може да созреат до тој степен што научниците почнуваат да ги користат за да ги проучуваат болестите на мозокот кај возрасните, како што е деменцијата.
Органоидите се создаваат од таканаречените индуцирани плурипотентни матични клетки, од кои може да се развијат многу други видови клетки.
Матичните клетки што ги користеле научниците се добиени од кожни и крвни клетки и биле репрограмирани за да се вратат во ембрионална состојба.
Кога клетките се изложени на соодветни хемикалии и услови, тие се развиваат во мозочни клетки и се самоорганизираат за да произведат тродимензионални структури кои се верна реплика на одредени аспекти на развојот на вистинскиот човечки мозок.
Научниците веќе користат органоиди на човечки мозок за да проучат невролошки невроразвојни нарушувања, вклучително и аутизам, епилепсија и шизофренија, пренесуваат научните портали.