Аморим бара трпение по ремито против Ипсвич: Нѐ чека долг период на страдање

Навивачите на Манчестер Јунајтед очекуваа многу од доаѓањето на Аморим, но Португалецот ги разочара на своето деби. Плановите на новиот тренер на „Црвените ѓаволи“ ги наруши Ипсвич, кој одигра храбро и стигна до реми од 1:1.

Сепак, Рубен Аморим не беше многу загрижен по овој резултат, туку најави долг период на страдање, а од симпатизерите на Манчестер побара трпение.

„Знам дека е фрустрирачки за навивачите, но ние менуваме толку многу работи во моментов, со толку многу натпревари. Нѐ чека долг период на страдање и обиди да победиме, ќе биде потребно време. Можеме да победиме против Ипсвич, но можевме и да загубиме да не беше Онана. Мораме да размислуваме и да бидеме прагматични за фактот дека овие момци имаа само два дена да тренираат и да променат толку многу. Ова е захтевна лига, го сфаќате тоа веднаш штом ќе дојдете. Моите играчи толку многу размислуваа за играта, што можеше да се почувствува. Не само додека ја имаа топката, тие цело време размислуваа каде треба да бидат и тоа е толку тешко кога имаш само два дена да го воиграш тимот“, рече Аморим.

Јунајтед поведе со голот на Маркус Рашфорд по само 2 минути игра, но не знаеше како да ја зачува предноста.

„Ако го погледнете првото полувреме, ќе видите дека тие беа малку исплашени. Сем Морси од Ипсвич секогаш беше сам. Моравме да скокнеме на него. Хачинсон секогаш беше во мртвиот простор. Имавме само два дена и бевме малку збунети“.

На Португалецот очигледно ќе му треба време за да го извлече максимумот од сите играчи.

„Почнувам да откривам работи што не ги знаев, како Гарначо да може да ја задржи топката меѓу противничките линии. Ќе се обидеме да најдеме такви работи и да ги искористиме. И ќе ни треба време да ги откриеме тие работи“, заклучи Аморим.