Аморим за отпишаниот Рашфорд: Попрво би ставил тренер на голмани отколку него

Менаџерот на Манчестер Јунајтед, Рубен Аморим, изјави дека повеќе би сакал да го стави својот 63-годишен тренер на голманите како замена отколку Маркус Рашфорд или кој било друг играч на Манчестер Јунајтед кој не дава максимум на тренинзите.

На прашањето за отсуството на Рашфорд од тимот кој го победи Фулам со 1:0, Аморим рече дека „причината е тренингот“.

„Причината е секогаш иста. Причината е тренингот, начинот на кој гледам што треба да прави еден фудбалер. На тренинзите, во животот, секој ден, секој детаљ. Така, ако работите не се сменат, јас нема да се сменам“, јасен е Аморим, додавајќи:

„Иста е ситуацијата за секој играч. Ако работи напорно, ако ги прави вистинските работи, можеме да го искористиме секој играч. Можете да го видите тоа денес на клупата - ни недостига малку темпо да одиме, да ја промениме играта, да поместам некои фигури, но јас го претпочитам така. Ќе го ставам Витал (тренер на голманите) пред да ставам играч кој не дава максимум секој ден, па нема да се менувам околу тоа“, тврди Португалецот.

Да потсетиме, од доаѓањето на Аморим во Манчестер, Рашфорд практично е пречкртан и се очекува да го напушти клубот до крајот на преодниот рок.

Како главен кандидат за негово доведување се споменува Барселона која пред трансферот мора да го усогласи буџетот за да може да го доведе.