Тренерот на Реал Мадрид беше остар на прес-конференцијата во Лајпциг и не штедеше зборови кон играчите кои се плашат од повреди.
Кралскиот клуб вечерва гостува кај германскиот тим во 5. коло од Лигата на шампионите. Со оглед на тоа што е прв со 10 бода и пласманот во наредената фаза му е заверен, останува само да го завери првото место, што и во случај на денешен неуспех не би требало да биде проблем со оглед на тоа што во последното коло игра дома против аутсајдерот Селтик.
Ваквиот развој на настаните предизвика одредени играчи да посакуваат да не играат вечерва на спопред нив „неважниот“ натпревар, а со цел да не ризикуваат повреди.
Едно од прашањата кои Карло Анчелоти ги доби од присутните новинари се однесуваше и на стравот од повреди кај поедини фудбалери од неговиот тим.
„Страв од повреди? Па повредите се дел од работата. Ако не сакате да се повредите останете на каучот. Тие што се плашат од повреди, нека си останат дома, секогаш има добри филмови и серии за гледање“, беше крајно интересниот коментар на италијанскиот стратег.
Вечерва во Лајпциг нема да играат Лука Модриќ, Феде Валверде, Карим Бензема, Дани Себаљос и Мариано Диас кои воопшто и не допатуваа во Германија. За сите освен Модриќ се знае дека се повредени, додека за Хртватот Реал само соопшти дека нема да биде во комбинација без да ја наведе причината. Шпанските медиуми синоќа објавија дека тој има мали проблеми со адукторот и превентивно останал во Мадрид - веројатно ќе гледа филмови или серии, како што вели Карло.
Лајпциг и Реал играат од 20:45 на „Ред Бул“ арената во Лајпциг, а натпреварот ќе го суди сонародникот на Анчелоти, Даниеле Орсато.