Фудбал
КВАЛИФИКАЦИИ ЗА ЕУРО 2020

Ангеловски: Играчите покажаа уште еднаш како се бори за дресот на Македонија

6. септември 2019 - 9:25 | МИА
Бершева, 6 септември 2019 (МИА) – Репрезентацијата на Македонија одигра нерешено 1:1 на синоќешното гостување против Израел во квалификациски меч за ЕП 2020, а селекторот на „црвено-жолтите“, Игор Ангеловски по мечот изјави дека е задоволен од освоениот бод, но дека жали за испуштената шанса да си заминеме со сите три.

Новото засилување на Наполи, Елиф Елмас во судиското продолжение од мечот имаше голема шанса да донесе победа откако излезе сам пред противничкиот голман, но тој реши да асистира, наместо да реализира.

– Задоволни сме можеби со бод, но можеме да жалиме за сите три бодови по големата шанса во финишот. Им честитам на моите фудбалери за прикажаната игра, покажаа уште еднаш како се бори за дресот на Македонија и ова се играчи кои никогаш не се предаваат. На стартот сакавме да го неутрализираме противникот и да добиеме играч повеќе во средниот ред, па токму поради тоа ги избрав тие фудбалери. Во секој случај ваквата игра треба да ни биде дополнителен мотив да одиме на победа во Латвија, изјави Ангеловски на прес-конференцијата.

Нашата репрезентација следниот дуел го игра во понеделник, кога гостува на Латвија во Рига од 20:45 часот.

Коментирај