Фудбалерите на Англија и Соединетите Американски Држави се пласираа во осминафиналето на Светското првенство откако синоќа се одиграа натпреварите од третото коло од групната фаза.
Англија ја заврши групата Б на првото место со седум бодови. САД се втори со пет, Иран е трет со три, додека Велс освои само еден бод.
Синоќешното островско дерби ѝ припадна на Англија која победи со 3:0. Велшаните се чинеше дека веќе се простија од нокаут фазата, па од почетокот на натпреварот не беа на очекуваното ниво.
Иако првото полувреме го издржаа без примен гол, во вториот дел доживеаја катастрофа. Рашфорд доминираше, погодувајќи најпрво во 50. минута од слободен удар, а потоа во 68. минута по одлична соло акција зголеми на 3:0. Во меѓувреме гол постигна Фоден по асистенција на Кејн.
Многу понеизвесен беше натпреварот меѓу САД и Иран. Американците на крајот остварија златна победа со голот на Пулишиќ по одлична акција во која учествуваше речиси целиот тим. Иранците до крајот на натпреварот не успеаја да постигнат гол со што ќе ги однесеше во второто коло, па турнирот за нив заврши синоќа.
Познати се и првите два пара од осминафиналето на Светското првенство. Англија ќе игра со Сенегал и овој натпревар е закажан за в недела. Ден претходно САД ќе играат против Холандија.
