Кристијано Роналдо даде ексклузивно интервју за Пирс Морган во кое го нападна тренерот на Манчестер Јунајтед, Ерик тен Хаг, и го оцрни клубот.
Со ова го навлече гневот на навивачите на Јунајтед кои сметаат дека е време да го напушти клубот, но ги разочара и соиграчите кои не можат да разберат зошто така истапи во јавност.
Она што англиските медиуми особено го истакнуваат како неразбирливо е начинот и моментот во кој Роналдо реши да го претстави своето видување на ситуацијата во клубот.
Наводно, клубот за интервјуто дознал кога се подготвувал за повратниот лет од натпреварот против Фулам.
Непочитување кон клубот и соиграчите
Нивниот впечаток е дека клубот покажал почит кон Роналдо дури и кога тој побарал да си замине или одбил да влезе како замена против Тотенхем. Поради ова, никому во клубот не му е јасно зошто Роналдо реши да се жали во јавноста и со тоа да го наруши угледот на клубот.
Sky Sports пренесува дека на Роналдо во четвртокот му било кажано дека нема да биде во стартниот состав за натпреварот со Фулам, туку дека ќе биде дел од тимот што оди таму.
Наводно, тој тогаш рекол дека е болен и не може да патува со остатокот од тимот. Тајмингот на интервјуто уште повеќе ги фрустрира челниците на клубот, се наведува, и се додава дека сега клубот ги разгледува сите опции во врска со иднината на Роналдо таму.