Хакерите од Anonymous објавија видео во кое му се обратија на извршниот директор на Tesla и SpaceX, Илон Маск поради „тролањето“ на крипто пазарот.
Anonymous му порачаа на Маск дека луѓето го доживуваат како „уште еден нарцисоиден богаташ кој очајнички бара внимание“. Нивната порака доаѓа откако Маск во петокот на Twitter објави твит за биткоинот по што цената на криптовалутата падна.
На Маск му порачаа дека неговите твитови покажаа „очигледно занемарување на просечниот работни кој со вложување во криптовалути сака да го подобри животот“.
„Можеби мислиш дека си најпаметната личност во собата, но сега си најде рамен на себе. Ние сме Anonymous, ние сме легија. Очекувај нè“, порачаа во видеото.
Маск не одговори директно на заканата, но по 20 минути од објавувањето на видеото, тој објави нов твит.
„Не го убивајте тоа што го мразите, спасете го тоа што го сакате“, порача тој.