Откако од ВМРО-ДПМНЕ најавија дека очекуваат поддршка од Левица за победа и во вториот круг над владејачката СДСМ, лидерот на Левица преку Facebook најави дека тешко ќе дојде до такво нешто.
„Не смее да има никакво коалицирање со партии кои имаат дамки во своето работење! КОАЛИЦИРАЊЕТО ЌЕ ЈА РАЗВОДНИ ИДЕОЛОГИЈАТА. Од тоа корист ќе имаат само нашите ривали“, напиша професорот по римско право цитирајќи ги зборовите кои тогаш младиот Фидел Кастро ги кажал во 1948 година откако неговата партија влегла во кубанскиот Парламент со само два пратеника, слично како и Левица на Апасиев.
Неговиот статус го коментираше лидерот на најголемата опозициска партија, Христијан Мицкоски, кој изјави дека не му е јасна пораката и повика на соработка.
„Нашата врата е отворена, раката е подадена. Малку бев збунет од утринската комуникација на лидерот на Левица преку социјалните медиуми, но еве оставам тие да изберат каква сакаат соработка со блокот, дали тоа ќе биде во рамки на формална коалиција, дали ќе ги поддржат кандидатите, оставам на нив тие да одлучат. Еве нека не биде притисок ова што јас го зборувам затоа што очигледно дека протестните гласови на граѓаните во Македонија се најмалку двапати поголеми од оние гласови кои во моментов ја поддржуваат коалицијата на СДСМ“, рече Мицкоски во изјава за медиуми.
