Иако возрасните често се бунтуваат кога децата минуваат подолго време пред екрани, технологијата има и свои предности, особено кога станува збор за поттикнување на креативноста кај најмалите.
Креативноста е ментален процес кој вклучува создавање нови идеи или решенија за проблеми, како и врска меѓу новите и постојните идеи и поими.
Токму оваа вештина е потребно да се развива кај децата од најрана возраст. Поттикнувањето на креативноста долгорочно ќе се исплати бидејќи креативните луѓе се посамоуверени, похрабри, позрели, имаат смисла за хумор, ги извршуваат задачите до крај и се многу независни за разлика од другите.
Постојат неколку апликации кои можат да помогнат во развојот на детската креативност, а ова се дел од нив. Бесплатни се и се достапни за iOS и Android.
1. Brain Games Kids
Едноставна апликација која нуди 12 различни игри, од сложувалки до судоку и игри на меморија.
2. Toontastic
Ако вашето дете почнало да учи англиски, а сака и приказни, оваа апликација е идеална за него. Со помош на оваа апликација детето може да измисли цела приказна која може да се темели на претходно прочитани книги. Може да креира свои ликови, да го смисли целото дејство, да го сними сопствениот глас и да го претвори сето тоа во анимирано видео.
3. Magic Piano
За оние дечиња кои сакаат музика и сакаат да свират на пијано оваа апликација е одлична за нив. Ќе учат за тоновите и музиката низ игра.
Може да се контролира темпото и ритамот, да одберете ниво на сложеност, различни жанрови и инструменти. Апликацијата не е насочена само кон класичната музика туку нуди можности за поттикнување дополнителен интерес кај децата.
4. MoMa Art Lab
Со помош на оваа апликација децата ќе учат за боите и основните геометриски форми, а според тоа ќе создаваат свои ликовни дела. Оваа апликација е одлична за помалите деца.
5. Sketch
За поголемите дечиња е идеална апликацијата Sketch, која е еден вид социјална мрежа за делење на создадените дела. Секој ден се дава нова задача на одредена тема, па така овде може да се најдат совети за цртање или сликање на буквално сè.
Тоа што е добро кај оваа апликација е што се црта на хартија со различни бои, темперни боички, водени боички, туш или пенкало, а потоа може цртежот да го фотографирате и да го пренесете на апликацијата за да биде споделен со останатите.
