Аргентина и натаму прва, Шпанија во топ 3 на новата ранг-листа на ФИФА

Новите континентални шампиони Аргентина и Шпанија, заедно со втората Франција, ја сочинуваат најдобрата тројка на јулското рангирање на ФИФА.

Аргентина ја одбрани титулата на Копа Америка и го задржа првото место на ранг-листата на ФИФА, додавајќи нови 41,34 поени на своето конто.

По бледиот настао на ЕУРО, Франција остана на второто место, но додаде само 17,44 поени, па прашање на време е кога ќе падне.

На третото место се искачи новиот европски шампион Шпанија, која со 7 победи од исто толку натпревари убедливо триумфираше на Стариот континент. Шпанците на своето конто додадоа дури 105,75 поени и сега ги делат само уште 19 до второто место на Французите.

Европскиот финалист Англија го презеде 4. место од бледиот Бразил, кој разочара на Копа Америка. Белгија излезе од топ 5. Во првите 10 се уште и Холандија, Португалија, Колумбија и Италија. Само Колумбијците се нови во најдобрите 10, а ги заменија Хрватите, кои апсолутно потфрлија на ЕУРО.

Македонија не беше активна изминатиов период, па не доби ниту изгуби поени, но назадуваше едно место бидејќи Грузија забележа скок освојувајќи 22,5 поени благодарение на победата над Португалија и ремито со Чешка на ЕУРО. Македонија сега е на 72. место, а Грузија е 70-та.

Македонската репрезентација од септември ја чекаат предизвици во новата сезона од Лигата на нации. Според јулскиот ранкинг, вака изгледа поредокот во нашата група од Лигата Ц:

  72. Македонија 1348,63
  97. Ерменија 1230,79
137. Латвија 1095,98
138. Фарски острови 1093,7

Најголем скок од дури 17 места оствари Венецуела, која стигна до четвртфиналето на Копа Америка каде на пенали загуби од Канада. Претходно во групата ги доби сите три натпревари (Еквадор, Мексико и Јамајка). Венецуела сега е на 17-тото место.

Најмногу падна Чешка, дури 13 места, и сега е на 47. место. Чешка на ЕУРО имаше скор од 2 пораза (Португалија и Турција) и едно реми (Грузија), без победа.

Најмногу поени освои европскиот шампион Шпанија, 105,75, а најмногу загуби Самоа, 44,09, која на Купот на нациите (првенство на Океанија) ги загуби сите натпревари (Тахити, Фиџи, Папуа Нова Гвинеја). Самоа е на 192. место, паѓајќи 11 места.

На ранг-листата на ФИФА има вкупно 210 репрезентации, а последна е Сан Марино со 739,64 поени. Без рејтинг е Еритреја, поради неактивност.