Втор пораз за лидерот во Премиер лигата откако изненадувалки потклекна на гостувањето кај послабиот ливерпулски клуб.
Фудбалерите на Арсенал доживеаја неочекуван пораз на гостувањето на „Гудисон Парк“ губејќи со минимални 1:0 од тимот на Евертон.
Иако Арсенал имаше многу поголем посед на топка (70%) во однос на ривалот, гостите не успеаја да ја материјализираат иницијативата на теренот. Згора на тоа, Евертон создаде повеќе конкретни шанси, особено во првото полувреме, кога најзагрозувачки беа Докуре, Калверт-Левин и Гаје.
Одлучувачкиот погодок беше дело на 30-годишниот дефанзивец Џејмс Тарковски во 60-тата минута од натпреварот, кога по еден корнер најдобро се снајде во гостинскиот шестнаесетник. „Топчиите“ имаа половина час барем да дојдат до реми, но не успеаја да го најдат патот до мрежата на англиската репрезентативна единица, Џордан Пикфорд.
За Арсенал на овој натпревар неславно деби имаше новото засилување Жоржињо
Арсенал немаше пораз сезонава во Премиер лигата од почетокот на септември кога со 3:1 загуби од Манчестер Јунајтед.
Ситуацијата на табелата по ова 22. коло може значително да се искомпликува бидејќи Арсенал останува на 50 бодови, додека Манчестер Сити со евентуален триумф утре над Тотенхем ќе се доближи на само 2 бода негатива.
Од друга страна, Евертон со овој триумф барем моментално излезе од зоната за испаѓање.
