Ф1 тимот Астон Мартин и јапонскиот производител на автомобили Honda, ќе започнат соработка од 2026 година. Honda ќе го снабдува со мотори Астон Мартин, кога ќе стапат на сила новите прописи во шампионатот во Формула 1. Јапонската компанија наведува дека една од главните причини за соработката со Астон Мартин е тоа што Формула 1 се движи кон јаглеродна неутралност.
Honda официјално ја напушти Формула 1 во 2021 година, но има договор за техничка соработка за развој на мотори со Ред Бул и Алфа Таури до 2025 година.
Ред Бул ќе соработува со американскиот производител Ford од 2026 година.
Од таа сезона, моторите, кои се хибридни од 2014 година, ќе доживеат значително зголемување на употребата на електрична енергија и ќе користат 100% одржливо гориво.
Покрај Honda и Ford, во Формула 1 од 2026 година ќе влезе и германскиот гигант Audi кој ќе соработува со тимот на Заубер (моментално познат како Алфа Ромео).
Ферари, Мерцедес и Рено, моментално три од четирите производители на мотори присутни во шампионатот, ќе се натпреваруваат и во 2026 година.
За Астон Мартин оваа сезона возат Шпанецот Фернандо Алонсо и Канаѓанецот Ленс Строл.
Астон Мартин, кој по пет трки е на второто место во конструкторскиот шампионат зад доминантниот Ред Бул, моментално работи со Mercedes.
