„Фановите на атлетиката ќе бидат блиску до акцијата како никогаш до сега“, се пофали организаторот уште пред месец дена. И си го одржа зборот.
Мини-камерите поставени на стартните позиции треба да ги доловат моментите пред почетокот на трките, но токму поради нив атлетичарките се чувствуваат непријатно.
Не само што камерите ги снимаат во интимните делови, туку и местењето во позицијата за старт им е отежнато бидејќи мораат да се качуваат преку нив.
„Дали жена учествуваше во оваа идеја со камерите? Се сомневам. Многу ми е незгодно да се местам преку тие камери за да дојдам до позицијата за старт“, вели германската атлетичарка Џина Ликенкемпер за Bild.
Германската атлетска федерација веќе испрати жалба поради камерите и побара да се емитува слика само откако атлетичарките ќе успеат да се наместат на стартните позиции, а не и додека се местат. Жалбата е прифатена.