Асоцијацијата на професионални тенисери (АТП) го објави новиот календар за 2020 година според кој тениската сезона би требало да продолжи на 14 август.
Тенисот, како и останатите спортови ширум светот, беше паузиран во март среде брзото ширење на пандемијата со коронавирусот, а според новиот календар објавен денеска, тениската сезона треба да се обнови на 14 август во Вашингтон.
Тоа ќе биде првиот турнир, а потоа е планиран Мастерсот во Синсинати на 22 август, со таа измена што со оглед на тоа дека овој турнир ќе се игра во Њујорк, УС Опен ќе почека до 31 август.
Комплетниот распоред за 2020 се очекува да биде објавен во средината на јули.
Отвореното првенство на Франција во тенис е одложено за уште една недела и ќе се одржи од 27 септември до 11 октомври, потврдија организаторите на турнирот.
Квалификациите ќе се одвиваат од 21 до 25 септември. Грен слем турнирот во Париз првично беше закажан за мај и јуни, но беше одложен за 20 септември поради пандемијата со коронавирус.
Дали ќе им се дозволи пристап на навивачите сè уште не е јасно, но организаторите на Ролан Гарос соопштија дека ќе работат со француската влада за да се обезбеди безбедноста на сите присутни.
Седумкратната шампионка Серена Вилијамс потврди дека ќе се натпреварува на годинашниот УС Опен.
– Навистина не можам да дочекам да се вратам во Њујорк и да играм на Отвореното првенство на САД во 2020 година, рече Вилијамс во видеопораката објавена за време на прес-конференцијата на Американската тениска асоцијација.
На неа се потврди дека Грен слем турнирот ќе се одржи од 31 август до 13 септември без навивачи.
– Мислам дека Американската федерација ќе заврши навистина добра работа и ќе организира сè неверојатно и сите ќе бидат безбедни, рече 38-годишната Вилијамс.
Американката има освоено 23 Грен слем титули во сингл, а во последните две сезони загуби во финалето на УС Опен.
