Audi ни доаѓа електричен концепт кој најавува нов модел во сегментот на бизнис лимузини со систем на автономно возење од 4-то ниво.
Целта на Audi е јасна - да се понуди доживување на возење од прва класа. Во автономен мод на возење, воланот и ножните команди на Grandsphere се скриени, а кабината добива салонски карактер, каде патниците позади се опуштени како на кауч, а на располагање им се сите благодети на комуникацијата и мултимедијата.
Grandsphere го препознава возачот, му отвора врата и автоматски ги прилагодува седиштата. Предните седишта може да се завртат до 60 степени.
Дури и звучниците се изведени секој патник да може непречено да слуша своја музика, како во сопствена капсула.
Командната табла може да се користи и како големо платно за гледање на филмови или видео конференции.
Audi Grandsphere има должина од 5,35 m и ширина од 2 m, a висината на автомобилот изнесува само 1,39 m. Дизајнот говори сам за себе.
Електричниот погон е составен од два електромотори со вкупна моќност од 710 КС и 960 Nm вртежен момент. До стотка забрзува за околу 4 секунди, а максималната брзина уште не е соопштена. Автономијата во возењето е околу 750 километри со огромна батерија од 120 kWh.
Иако Audi уште нема потврдено, речиси е сигурно дека во овој концепт се крие новата A8 кој во светот на бизнис лимузините ќе донесе многу новитети. И тоа на почетокот на 2024 година.
