Австрија одлучи да инвестира една милијарда евра годишно до 2030 година за да го зголеми производството на обновлива енергија и целосно да ги укине фосилните горива.
„Поставуваме основа за климатска неутралност“, рече министерот за животна средина, Леонор Гевеслер, пред Парламентот кој вчера го донесе Законот за зелена транзиција.
Владејачката коалиција на конзервативната Австриска народна партија (OeVP) и Зелените сака значително да го зголеми производството на електрична енергија во фотоволтаични системи и ветерни електрани бидејќи хидроенергијата е веќе широко застапена.
За да се компензира намалената употреба на фосилни горива и да се задоволат енергетските потреби, производството на зелена електрична енергија мора да се зголеми за 27 терават часови.
Владата очекува да се отворат до 100.000 работни места
Владата го смета договорениот пакет за финансирање како прв чекор што би требало да поттикне повеќе од 30 милијарди евра инвестиции во зелениот сектор и предвидува дека ќе се отворат 100.000 нови работни места.
Инвестициите ќе бидат финансирани со зголемување на годишниот надоместок за зелена електрична енергија што ќе го плаќаат домаќинства од околу 100 на 115 евра. Домаќинствата со ниски примања ќе плаќаат 75 евра.
Законот беше поддржан од сите партии, освен крајно десничарската Партија на слободата на Австрија (FPOe), чиј портпарол за енергетика Аксел Кастегер предвиде во Парламентот дека Австрија сепак ќе мора да увезува фосилни горива во текот на зимата, дури и ако целосно ги реализира планираните инвестиции.
Тој исто така предупреди дека фотоволтаичните системи ќе опфаќаат земјоделско земјиште и со тоа ќе ја спречат неговата употреба.